Os servizos de orientación laboral que presten as entidades beneficiarias realizaranse de forma principalmente presencial, segundo as indicacións que se establezan mediante a publicación de instrucións operativas, e deberán axustarse para a súa realización ao establecido no artigo 11 do Real decreto 438/2024, do 30 de abril, polo que se aproba a carteira común de servizos do Sistema nacional de emprego e os servizos garantidos, incluíndo as seguintes actividades:

A) Elaboración dun perfil individualizado: comprenderá a elaboración dun perfil individualizado da persoa usuaria que permita a súa avaliación, co apoio, entre outros elementos, de evidencias estatísticas, para a mellora da súa empregabilidade, e que facilite o ulterior deseño ben dun itinerario personalizado formativo que inclúa todas as opcións dos diferentes sistemas de formación, ben dun proceso de busca activa de emprego. A elaboración do perfil individualizado realizarase mediante o diagnóstico da situación de partida da persoa usuaria, que comprenderá unha atención personalizada, para identificar as súas habilidades, competencias, formación e experiencia profesional, así como a súa idade ou pertenza a colectivos prioritarios, os seus intereses, a súa situación familiar, ámbito territorial, tempo e motivos de desemprego, percepción de prestacións ou axudas económicas á activación e calquera outra variable persoal ou social que poida ser relevante, en función das súas necesidades e expectativas. A partir deste diagnóstico elaborarase un perfil competencial onde se recollerán todas as competencias adquiridas pola persoa ao longo da súa vida. O diagnóstico resumirá a valoración realizada, destacando os factores persoais e profesionais que posicionan favorablemente a persoa usuaria na consecución do seu obxectivo profesional, así como os principais obstáculos de acceso ao emprego, incluídas as posibles desigualdades que puidese sufrir por razón de xénero, pertenza a colectivos de atención prioritaria ou outro condicionante sociocultural.

B) Titorización individual, asesoramento continuado e atención personalizada, que estará libre de prexuízo e estereotipos de calquera índole, especialmente de xénero, idade e discapacidade, orientación sexual, identidade de xénero, lingua e orixe nacional ou étnica, e prestará atención ás necesidades específicas das distintas etapas vitais, en particular aquelas que producen maior afastamento do mercado laboral, como a maternidade e o coidado de persoas menores ou maiores ou as causadas pola situación sociosanitaria das persoas e/ou dos tratamentos prescritos a elas.

C) Itinerario ou plan personalizado de actuación adecuado ao perfil da persoa demandante dos servizos de emprego, que detallará as principais actividades propostas co obxecto de mellorar a empregabilidade da persoa usuaria, e incluirá información específica sobre a formación específica dispoñible nos distintos sistemas de formación tendo en conta as necesidades do sistema produtivo, o emprego local e os sectores emerxentes ou estratéxicos ou, de ser o caso, iniciativas de emprendemento, autoemprego e economía social, así como as súas necesidades de conciliación corresponsable da vida familiar e laboral. O itinerario prestará especial atención á eliminación de nesgos e estereotipos de calquera índole, especialmente de xénero, idade, discapacidade, orientación sexual, identidade de xénero, lingua e orixe nacional ou étnica.

D) Deseño, planificación e execución de accións grupais de orientación laboral que poidan ser de interese, en función dos perfís das persoas orientadas, tanto para mellorar a eficiencia do servizo como para fomentar a interrelación e o intercambio de experiencias entre elas.

E) Apoio á xestión da mobilidade laboral.

F) Coordinación e colaboración co resto de persoal de orientación laboral de entidades colaboradoras e do SPEG para o intercambio de información e boas prácticas no eido do emprego, o emprendemento, a análise e prospección do mercado laboral e a captación de ofertas de traballo.

G) Mellora continuada das súas propias competencias e recursos profesionais para a orientación laboral a través da participación nas accións de formación e capacitación específicas que se determinen desde a Dirección Xeral de Formación e Cualificación para o Emprego.

A contía máxima da subvención que se concederá con carácter xeral será de 33.000 euros por cada persoa técnica de orientación laboral contratada a tempo completo durante un período de 12 meses, tomando como referencia os custos salariais e da Seguridade Social.

Adicionalmente subvencionaranse os gastos que se xeran polo desenvolvemento das actividades indicadas na Orde.

As contías dos módulos será de 800 euros por cada persoa técnica de orientación laboral contratada a tempo completo durante un período de 12 meses, e incluirán os seguintes conceptos:

1º. Gastos xerais, materiais e técnicos que se xeren na execución das accións.

2º. Formación das persoas técnicas orientadoras.

No caso das entidades sen ánimo de lucro que teñan entre as súas finalidades estatutarias ou fundacionais e se dediquen prioritaria e habitualmente á realización de actividades de atención a persoas con discapacidade e no caso de agrupacións de concellos en cuxo convenio se detalle o desprazamento da persoa orientadora entre os concellos integrantes do convenio e as mancomunidades de municipios que realicen desprazamentos, a contía do módulo será de 2.700 euros por cada persoa técnica e incluirá os seguintes conceptos:

1º. Gastos xerais, materiais e técnicos que se xeren na execución das accións.

2º. Gastos que se orixinen por axudas de custo necesarias para o desenvolvemento das accións.

3º. Formación das persoas técnicas orientadoras. Coa finalidade de cubrir o gasto xerado polo cumprimento do regulado na Orde, as entidades afectadas pola obriga de presentar o informe de auditoría recibirán un módulo adicional de 1.500 euros.

Nos casos dos módulos de 800 e 2.700 euros, a citada contía máxima reducirase proporcionalmente en función da xornada realizada, no caso de que a prestación de servizos da actividade subvencionada se realice a tempo parcial. Non se aplicará esta redución no importe destinado a cubrir o gasto do informe de auditoría nas entidades afectadas.

En ningún caso se subvencionarán servizos que supoñan contratacións a tempo parcial con xornadas inferiores ao 50 % da xornada laboral a tempo completo.

As modalidades de subvención previstas na Orde son:

- Mantemento do servizo: prevista para as entidades que pretendan a continuidade na prestación do servizo, sen interrupción, dende a data de finalización do anterior período subvencionable.

- Novo servizo: prevista para todas as entidades que non fosen beneficiarias de axudas no período anterior ou incrementen os servizos que se van subvencionar respecto deste, así como aquelas que, sendo beneficiarias no dito período, non opten pola modalidade de mantemento do servizo.

No caso das agrupacións de municipios, consideraranse novo servizo cando se modifique a agrupación existente na convocatoria anterior mediante o abandono dalgún/s dos seus integrante/s.