As obras ou servizos que se desenvolverán mediante a actividade das persoas traballadoras desempregadas deberán ser tarefas relacionadas, maioritariamente, coa prevención de incendios nas faixas secundarias definidas pola Lei de prevención e defensa contra os incendios forestais de Galicia, como son a planificación preventiva, a valorización forestal, a silvicultura, a limpeza de montes, a xestión da biomasa, e cumprir os seguintes requisitos:

a) Que sexan executados polas entidades locais en réxime de administración directa ou polos organismos, entes ou empresas públicas a que se encomende a súa execución.

b) Que, na súa execución ou prestación, se favoreza a formación e a prácticas profesional das persoas desempregadas.

c) Que as persoas que se contraten para labores de coordinación vinculadas á prevención e defensa contra os incendios forestais manteñan contacto e colaboración permanente co persoal encargado de garantir o sistema público de xestión da biomasa, segundo dispón o Convenio de colaboración entre a Xunta de Galicia, a través da Consellería do Medio Rural, e Seaga (Resolución do 15 de decembro de 2025; DOG núm. 250, do 29 de decembro), en materia de prevención e defensa contra os incendios forestais.

d) Que a entidade local dispoña de asignación orzamentaria suficiente para facerse cargo das partidas orzamentarias non subvencionadas para a realización das obras ou servizos.

e) Que a duración dos contratos das persoas desempregadas que desenvolvan a prestación dos servizos sexa igual ou superior a nove meses.

f) Que as contratacións sexan para xornada a tempo completo.

g) As contratacións que se realicen non poderán ter por obxecto cubrir postos de traballo vacantes na relación de postos de traballo da entidade beneficiaria.

A Consellería de Emprego, Comercio e Emigración, en coordinación coa Consellería do Medio Rural, poderá desenvolver accións formativas para as persoas traballadoras contratadas, en colaboración coas entidades que resulten beneficiarias destas axudas, para tarefas de limpeza e mantemento de vías e parcelas, e/ou tarefas de prevención de incendios.

O contido dos devanditos cursos e as datas e centros de impartición serán delimitados no correspondente acordo de colaboración que subscriban ambas as consellerías, e contarán, polo menos, con formación teórica en prevención de riscos laborais, así como formación, teórica e/ou práctica, en manexo de maquinaria e demais ferramentas necesarias para os labores que se vaian desenvolver.

A contía da subvención será, para efectos salariais, a equivalente á necesaria para sufragar os custos salariais totais, incluída a cotización empresarial á Seguridade Social por todos os conceptos na mesma cantidade que a fixada para o salario segundo o convenio colectivo vixente no momento de formular a solicitude, por cada persoa traballadora desempregada contratada, cos seguintes importes salariais máximos subvencionables:

Para os grupos de cotización 1 e 2: 26.249,26 €.

Para os grupos de cotización 3 a 7: 21.000,56 €.

Para os grupos de cotización 8 a 10: 16.955,03 €.

As persoas que se contraten para os labores de coordinación, segundo o disposto, incluiranse en todo caso nos grupos de cotización 1 ou 2.